2007年7月13日

老父講古 (二) - 西瓜叔父

記得老父教過,做人出社會做事,最重要是"忍耐",無必要的話唔好跟人"霎氣",無謂逞一時的英雄,得失別人,亦傷了自己的氣。他說了一句差不多二十年前的故事……


當年當差守觀塘。工業區那邊好旺,中午工人放飯時間,條街就人頭湧湧,小販亦乘機擺檔搵食。當年未有小販管理隊,拉小販由警察做埋。

我跟大隊去到巧明街附近執行任務。一落車,D小販就"走鬼",場面好混亂。但其中有一個賣西瓜叔父,就非常"老定"。我一個人行過去諗住charge佢,點知佢即時用西瓜刀大大力拍打他的賣貨車仔,同時大聲講:「你夠膽你就過o黎!你又搵食我又搵食,你駛唔駛趕絕我o地呀?埋o黎拉我!死差佬!睇o下邊個死先!」加多一大串侮辱警察的說話與粗口。當年的民智不算高,圍觀的工人見狀立時起哄:「走啦!差佬!人o地搵食你都要拉!」他們都企在賣西瓜叔父的一邊。

大庭廣眾之下,比咁多人"落臉"。如果我當時忍唔住度氣,即時扯火,用警棍或警槍去拉那個叔父,雖然我絕對有這個權,但情況一定更加混亂。我不怕"無臉",轉身就走。在場人士仲即時歡呼拍掌。個叔父就更加得戚。

但"無臉"只不過是一分鐘的時間,所謂「君子報仇十年未晚」,我忍佢一時,唔代表佢可以逍遙法外。之後兩日,我暗中落返去巧明街,向其他小販打聽消息。得知原來那位叔父中午過後,會行開去吃飯,由老婆頂檔……

某日,我大隊來一次「突擊」,趁西瓜叔父行開食飯之時,一隊人衝埋去,連架賣貨車仔同佢老婆一齊"的"返差館。返到差館,我o地班伙記唔理三七廿一,將成部車仔拆散晒。佢老婆都嚇到傻o左,都唔知發生乜o野事。

其後,西瓜叔父到差館保釋老婆,見到自己架車仔變o左堆廢物,真係"喊都無謂"。佢在差館撞到我,他手上無刀,周圍都是差人,無晒當日的氣焰。他唔客氣的說:「阿Sir!你好o野!」,我亦回敬一句:「駛乜講?!當然好o野啦!」


觀塘巧明街一帶現貌


想認識我老父?今天咁o岩佢上電視!

http://hk.news.yahoo.com/070713/314/2bgnf.html
(請留意1分31秒的"街坊")
Related Posts Plugin for WordPress, Blogger...

熱門文章