老父講古(七) - 測謊機

鯉魚門三家村 (筆者攝)

筆者以前經常呼籲家父家母找機會嘗試上網，因為退休時間多，如果只在家看電視，人只會越來越封閉(加上本地的節目極不濟)。如今資訊發達，上網能知天下事、可聯繫天下人，我相信，如果他倆能上了網，將來便不會與時代脫節，人生亦更精彩。


近日，父母家的網絡終於搭通了。因為他倆對電腦已有基本認識，我教了兩課，他們已懂得上網的基本步。筆者跟他們說：「你上網，仲可以搵到你個仔，即係我，所寫o既文章，有唔少更關於你兩位。」我即打開本Blog作示範，開出以前寫下老父說出的故事「老父講古」幾則。我說：「我所寫的未必係你所講o既全部，當中有(大)部分係我加鹽加醋，不過，你呢D故事都頗受網友歡迎，最主要原因係我個網多人睇嘛」(有點自豪) 我續說：「其實更多年前所寫、節錄你所講的俚語的『老父語錄』更受歡迎哩，可惜舊網站已消失了 (幸好這裡有人轉載)」


老父看著看著他的「講古」的第一集「急才」，似是津津有味，忽然興之所致，隨口又說出另一個關於「急才」的故事 ：


「話說當年，大約是80年代，我在觀塘當雜差(便裝)。當時鯉魚門三家村接連發生幾宗"老爆"(爆竊案)。不久，夥計在附近"周"到一件"I.I. " (illegal immigration，非法入境者) 返差館。呢件"I.I." 夠硬淨，我地班夥計用晒乜o野嚴刑迫供、大刑侍候，迫佢講出賊贓收在哪，他都死口唔講。」我問：「你地肯定係佢做？」老父說：「我地無十足把握肯定"老爆"是他所為，但可疑度很高，無理由放人。那個"I.I."又夠醒，知道一講出實聽坐監或遣返，所以打死都唔講。」


老父說到"戲肉"：「正當手足都無晒符之際，一位夥計行出房外，搬了一部壞的收音機入來。o個件機已經"甩皮甩骨"，殼又爛、電線又鬆的舊款收音機……」我問：「用電刑？」老父講得越來越眉飛色舞：「唔係，個夥計捧著個爛收音機，然後對著"I.I."大大聲講：『哪！你係唔肯認。好！等我用部“測謊機”試 o下你有無講大話先！如果係講大話，部機就會響，如果測到你無老點我，咪放你走囉。』我地一班夥計知道佢出橋呃個"I.I."，但當然唔會"督爆佢"，大家都忍住笑，仲同佢將收音機的爛電線撓落個"I.I."隻耳仔，作晒狀要開始測謊。o個時，個"I.I."終於知驚喇，和盤托出，招認了幾宗"老爆"都係佢所為。」


老父用兩句話總結故事：「唔一定要嚴刑拷問，有時妙計都可以破案。」接著說：「仲有，幫我將個故事放上網。」

收音機當"測謊機"